Stærri netþjónar?

Hef tekið eftir því stundum undanfarið þegar ég fer inn á vefinn hjá Mogganum að það er eins og vefurinn hjá þeim sé ekki að höndla þetta.  Bæði er blog.is mjög oft hægt og einnig bara úti.

Spurning hvort þeirð verði ekki að fara að stækka við sig serverana.

Ég veit amk. hvar þeir fá tölvukæli, ef það þeir eru með hitavandamál

Austfirðingur ársins fastur heima

Miðað við lestur heimasíðu Magna er auðvitað að búast við uppþotum, Magni og grúppíur mæti á Austurvöll. Kannski að þetta verði upphafið að endinum hjá Valgerði, þegar Austfirðingar munu refsa henni fyrir að hjálpa þessum Austfirðingi ársins að sækja frægðina.

Maður spyr sig svo hvað sé að þessum tollayfirvöldum í Bandaríkjununum, horfðu þeir ekki á Rockstar?

Talandi um Magna þá sá ég vital við Dilönu í Sirkus í dag, þar fullyrðir hún að fyrverandi kona Magna telji sig vera ástæðuna fyrir skilnaðnum. Talandi um að gefa spjallvefjum netsins byr undir báða vængi?

Magni án atvinnuleyfis

Góðmenni hjá alcan?

Nú hefur það almennt verið mín skoðun að menn hafi haft það ágætt að vinna hjá Ísal. Þetta er fyrirtæki þar menn hafa haft góð laun og starfsaldur hefur verið langur.

Undanfarið hafa hins vegar verið á floti sögur þess efnis að staðan sé ekki þannig, menn séu reknir rétt fyrir starfslok til að spara fyrirtæki.

Ég veit reyndar ekki hvað það er sem fyrirtækið ætti að þurfa að greiða við starfslok, hér á Íslandi erum við með lífeyrissjóðakerfi og engin réttindi bundin við einkafyrirtæki í þessum efnum. Menn leiðrétta mig hérna bara ef þeir vita betur og sjá hvað Ísal græðir á að reka menn rétt áður en þeir ljúka starfsævi sinni hjá þeim.

Hins vegar hef ég enga trú á að sérstök manngæska sé bundin þeim samningum sem voru gerðir hér við þessa menn. Þeim var einfaldlega rétt dúsa til þess að klára þessi mál. Það er vont fyrir fyrirtæki í stækkunarumræðum að vera með reglulegar fréttir af því að þeir hafi (amk. hugsanlega) farið illa með starfsmenn sína.

Þetta vissi líka ASÍ, þeim var því í lófa lagt að ná góðum samningum.

Samið við þrjá starfsmenn Alcan sem sagt var upp störfum

Blogg framkvæmdarstjóra

Það er gaman þegar forstjórar stórra fyrirtækja eru að blogga, það fyrirtæki sem ég hef oftast verslað vefhýsingu hjá er með bloggandi forstjóra. Stundum þegar eitthvað gerist kíki ég á bloggið. Það er bloggið hjá bluehost:
http://www.mattheaton.com

Eini íslenski framkvæmdarstjóri sem ég veit um á íslandi og er að blogga er Egill hjá Brimborg. Hann hefur mest verið að blogga um eigið hugðarefni, hins vegar er Brimborg auðvitað eina bloggandi fyrirtækið.

Fyndin frétt af visi.is.  

Vísir, 11. jan. 2007 22:45

Samúræji til bjargar!

Lögreglan í bænum South Shields í Bretlandi er að reyna að hafa upp á dularfullum samúræja sem birtist upp úr þurru og hjálpaði tveimur lögreglumönnum að verjast þremur vopnuðum glæpamönnum og handtaka þá. Dularfulli samúræjinn hvarf síðan út í næturmyrkrið, sporlaust.

Lögreglumennirnir voru óeinkennisklæddir og löbbuðu fram hjá húsi þar sem rán var að eiga sér stað. Þeir hlupu inn og mættu þar þremur vopnuðum mönnum sem ætluðu sér að ráðast á lögreglumennina. En um leið og einn þeirra stakk til annars lögreglumannsins með hníf sínum birtist dularfulli samúræjinn og bjargaði málunum.

Vefsíða Sky News skýrir frá þessu í dag.

Allt í lagi fyrir Valgerði

Það var að heyra á Valgerði að þetta væri bara allt í lagi, frumleg og ný aðferð til þess að ná árangri í prófkjörum að bjóða framsóknarfélaginu upp á 2 milljónir.

Hvað segði Valgerður ef einhver stæði fyrir framan kjörstað og biði hverjum og einum 2000 kall? 

Væri það í lagi eða bara frumleg aðferði í kosningabaráttu?

Framsóknarhugleiðingar

Þeir mega eiga það Guðni og félagar í Suðri að þetta hefur ekki verið mjög opinber barátta hjá þeim. Það er væntanlega þroskamerki hjá Framsóknarflokknum í Suðurkjördæmi að ekkert skítkast hefur verið í fjölmiðlum, eins og hefur tíðkast mjög oft hjá flokkum þar sem hörð barátta hefur verið um efstu sætinn.

Mér finnst stórkostlega að heyra í framsóknarmanninum fyrir Norðan sem reynir að bera fé á flokkinn. Veit ekki hvort þetta viðhorf sé ríkjandi annars staðar en þetta er amk. frumlegt hjá honum. Hann hefði kannski átt að bera þessa snilldar hugmynd undir einhvern annan en konuna sína (ef hann hefur þá gert það) áður en hann sagði fleirum frá þessu. Sumar hugmyndir hljóma rosalega vel á teikniborðinu en geta snúist svona herfilega í höndunum á mönnum. Ég efast um að hann eigi langframa innan stjórnmálanna.

Ef þetta væri hægt, er spurning afhverju flokkurinn er yfir höfuð að standa í prófkjöri. Miklu hagkvæmara fyrir flokkinn að safna í sjóðina og setja verðmiða á hvert sæti.

Maðurinn er auðvitað í kolvitlausum bransa, hann ætti að skella sér til liðs við strákana í bönkunum. Þeir eru allta að leita að nýjum fjármálavörum. Nokkuð áhugaverð trygging á kosnignabaráttunni, ef ég sigra greiði ég 2, en ef ég tapa ekki neitt.

Annað sem vekur athygli um þessar mundir er að Kiddi Sleggja virðist ætla að þiggja 3 sætið á lista Framsóknar. Um þetta hafa verið mikla vangaveltur en nú er búið að leggja fram listana og er nafn Kristins þar inni. Kristinn hefur ekkert gefið upp undanfarið en það hafa verið mikla vangaveltur hvort hann væri að láta bjóða í sig á bakvið tjöldin.

Það er styrkleikamerki að hafa Kristinn á listanum, Kristinn hefur verið eins manns flokkur og margar kunna honum miklar þakkir fyrir að vera ekki þessi "liðsmaður" sem sumir yngri þingmenn hafa spilað fram um leið og kosið er gegn sannfæringu sinni.

Góð viðbrögð

Eins og lesendur bloggsins míns vita var eitt fyrsta verk mitt sem forseti JCI Esju að skipuleggja ræðunámskeið og kynna það. Því er skemmst frá að segja að það eru bara örfá sæti laus í námskeiðið og gríðlegt gleðiefni fyrir nýkosinn forseta að það stefni í svo gott námskeið.

Það góða við JCI sem samtök er samt að maður fær þjálfun og ef maður hefur áhuga á þá nær maður vonandi síðar að gefa til baka og þjálfa sjálfur. Það er kosturinn við þessi námskeið.

Ég hef verið svo heppinn að fá gott fólk með mér í félag, svo við erum með frábæra kennara til að sjá um þetta. Lesendur bloggsins þurfa að hafa litlar áhyggjur af því að ég muni sjá um að þjálfa.

Apple telur sig hafa einkaleyfið!

Þetta er nokkuð merkilegt mál en í fyrstu hélt ég að þetta væri einhverskonar tíma bundinn leikur hjá Apple, svona á meðan þeir væru að koma umræðu og kynningu af stað. Svo myndu þeir gefa Cisco einhvern pening og skipta um nafn á græjunni og fá kynningu umfram það sem peningar fá keypt.

Þetta virðist hins vegar ekki vera málið, Apple hefur einfaldalega sótt um einkaleyfið á þessu sem farsímum en leyfið sem Cisco er með:

"computer hardware and software for providing integrated telephone communication with computerized global information networks"

 einkaleyfið sem Apple hefur sótt um (og fengið) er hins vegar:

 "handheld and mobile digital electronic devices for the sending and receiving of telephone calls, faxes, electronic mail, and other digital data..." 

Nú er ég ekki lögfræðingur en þetta hljómar samt eins og Apple sé á frekar gráu svæði þrátt fyrir þetta, enda á græjan að tengja saman síma og tölvur. Þeir ætla samt greinilega að láta sverfa til stáls. 

Ég skil þó vel að þeir eru að reyna að að ná samningum.

Barist um iPhone-nafnið

Siggi Kári tekinn

Ég horfði á Sigga Kára í Tekinn áðan, ég hafði lesið margt um þetta á blogginu og meðal annars um meinta endi á frama.

Ég verð að gefa honum bara nokkuð góða einkunn fyrir það sem þarna fór fram.