Lítill hávaði út að reykingarbanni

Það kemur á óvart hversu lítill hávaði hefur verið út af reykingarbanninu, einstaka kvörtun undan hávaða við skemmtihúsin en annars lítil umræða í fjölmiðlum.

Ég átti annars von á mjög öflugri andstöðu, fjöldann af greinum og táknræn mótmæli en af því hefur ekki orðið.

Ég hugsa að fólk sé bara dauðfegið, ég sæki nú ekki oft skemmtistaði en ég verð sjálfsagt dauðfegin næst sem það gerist og ég upplifi frekar typpa og svitafýluna, frekar en þann fjanda sem tóbaksreykur er.

Varðandi eignarréttinn, sem hefur verið ein helstu rök með þessu, þá er þetta ekki meiri skerðing á eignarrétti veitingahúsaeigenda en fjölmargar aðrar reglugerðir, sumir mega ekki selja áfengi, aðrir mega það á ákveðnum tímum.  Þeir þurfa að halda ákveðnum stöðlum í þrifum, húsnæðið þarf að vera innréttað á ákveðinn hátt og svo framvegis.  Menn hafa oft orðið að hætta rekstri vegna þess að það var of gaman hjá gestum og nágrannar kvörtuðu undan hávaða. Það er heilmikil skerðing á eignarrétti manna að opna veitingastað og nú hefur ein í viðbót bæst við. 

Það er gaman að heyra fórnalambavæðingu sumra reykingarmanna, þeir eru nú annars flokks þegnar landsins því þeir mega ekki spúa sínum reyk ofan i mig hvar sem er.  Ef þeir eru nú orðnir annars flokks fagna því þá bara að vera loksins orðinn fyrsta flokks þegn í landinu ásamt hinum 80%. 

Menn hefðu samt getað farið einhvern milliveg að mörgu leiti, til eru sérstakir reyk klefar t.d. sem eru með mjög öflugri ræstingu.   Það eru ýmsar aðferðir til þess að eyða reyk og lykt. Fram hjá þessum lausnum var alfarið litið.  Það hefði verið leið sem hefði komið báðum að gagni.

Athugasemdir

[Eva Þorsteinsdóttir, 11.6.2007 kl. 09:26]

Hmmm.... typpa og svitafýlu.

Hvurslags skemmtistaði sækir þú Tómas minn?

[TómasHa, 11.6.2007 kl. 09:39]

Þetta er bara orð sem reykjandi kunningjar hafa haft um skemmtistaði nú eftir að reykingar voru bannaðar.  Á einhverju leveli átti ég að þakka þeim fyrir að sleppa við þessa lykt.